همسه
¨°o.O الادارة O.o° 
عدد المساهمات : 281
تاريخ التسجيل : 24/03/2010
الموقع : haney2008009@yahoo.com
 |  موضوع: في عشق مصر الجمعة مايو 28, 2010 3:40 am | |
| على اسم مصر التاريخ يقدر يقول ما يشاء
وانا مصر عندي أحب وأجمل الأشياء
باحبها وهي مالكة الأرض شرق وغرب
وباحبها وهي مرميه جريحة ف الحرب
باحبها بعنف وبرقة وعلى استحياء
واكرهها وألعن أبوها بعشقها زي الداء
واسيبها واطفش في درب وتبقى هيه ف درب
وتلتفت تلاقيني جنبها ف الكرب
والنبض ينفض عروقي بألف نغمة وضرب
---------------------
على اسم مصر
---------------------
مصر النسيم في الليالي وبياعين الفل
ومراية بهتانة ع القهوة - أزورها - واطل
القى النديم طل من مطرح منا طليت
والقاها برواز معلق عندنا في البيت
فيه القمر مصطفى كامل حبيب الكل
المصري باشا بشواربه اللي ما عرفوا الذل
ومصر فوق في الفراندة واسمها جولييت
ولما جيت بعد روميو بربع قرن بكيت
ومسحت دمعي في كمي ومن ساعتها وعيت
---------------------
على اسم مصر
---------------------
مصر السما الزرقا وعصافير معدية
والقلة مملية على الشباك - مندية -
والجد قاعد مربع يقرأ في الجرنال
الكاتب المصري ذاته مندمج في مقال
ومصر قدامه أكتر كلمة مقرية
قريتها من قبل ما اكتب اسمي بايديا
ورسمتها في الخيال ع أبدع الأشكال
ونزلت أيام صبابا طفت كل مجال
زي المنادي وفؤادي يرتجف بجلال
---------------------
على اسم مصر
---------------------
النخل في العالي والنيل ماشي طوالي
معكوسة فيه الصور - مقلوبة وانا مالي
يا ولاد انا ف حالي زي النقش في العواميد
زي الهلال اللي فوق مئذنة بنوها عبيد
وزي باقي العبيد باجري ع عيالي
باجري وخطوتي وئيد من تقل أحمالي
محنية قامتي - وهامتي كأن فيها حديد
وعينيا رمل العريش فيها وملح رشيد
لكني بافتحها زي اللي اتولد من جديد
---------------------
على اسم مصر
--------------------- | |
|
اسير الاحزان
¨°o.O عضو مشارك O.o°
عدد المساهمات : 50
تاريخ التسجيل : 20/04/2010
الموقع : بلاد الله الواسعة
| | موضوع: رد: في عشق مصر الجمعة مايو 28, 2010 7:36 am | |
| الله عليكى يا مصر يا ام الدنيا يا اغلى الاوطان
تسلم ايديكى يا همسات على الموضوع الرائع
اللى بيفكرنا دايما ببلدنا الغالية مصر الحبيبة
شكرا ليكى ودمتى لينا بكل الخير | |
|
